തിരഞ്ഞെടുത്ത വാക്കുകൾ
പ്രധാനപ്പെട്ട ചില വാക്കുകളും അര്ത്ഥങ്ങളും
കോര്ട്ടിക്കോ ട്രാഫിന്.
പിറ്റ്യൂട്ടറി ഗ്രന്ഥിയുടെ അഗ്രഭാഗത്തുണ്ടാകുന്ന ഹോര്മോണ്. അഡ്രിനോ കോര്ട്ടിക്കോ ട്രാഫിന് ( ACTH) എന്നും പേരുണ്ട്. ഇതിന്റെ പ്രരണയാലാണ് അഡ്രിനല് കോര്ടെക്സില് കോര്ടിക്കോ സ്റ്റെറോയ്ഡ് ഹോര്മോണുകള് ഉണ്ടാകുന്നത്.
ഓസ്കുലം.
സ്പോഞ്ചുകളുടെ ശരീരത്തിനുള്ളില് നിന്ന് പുറത്തേക്ക് ജലം പ്രവഹിക്കുന്ന ദ്വാരം.
പാരിറ്റി
1.(math) പാരിറ്റി. രണ്ടുകൊണ്ട് പൂര്ണമായി ഹരിക്കാവുന്ന സംഖ്യകളുടെ പാരിറ്റി യുഗ്മം എന്നും ഹരിച്ചാല് ശിഷ്ടം വരുമെങ്കില് പാരിറ്റി വിഷമം എന്നും പറയും. പൊതുവേ യുഗ്മം ={2k:k∈z} വിഷമം ={2k+1:k∈z} 2. (phys) ഒരു തരംഗഫലനത്തിന്റെ ( wave function) സ്ഥലീയ നിര്ദേശാങ്കങ്ങളുടെയെല്ലാം ദിശ വിപരീതമാക്കിയാല് തരംഗഫലനം എങ്ങനെ പെരുമാറും എന്നു സൂചിപ്പിക്കുന്ന സമമിതി. സൂചകം p.ψ( x, y, z) =ψ(-x, -y, -z)എങ്കില് P = +1; പാരിറ്റി പോസിറ്റീവ് അഥവാ യുഗ്മം ആണെന്നു പറയും; ψ( x, y, z) = -ψ (-x, - y, -z) എങ്കില് P = -1, പാരിറ്റി നെഗറ്റീവ് അഥവാ വിഷമം ആണ്. പാരിറ്റി സംരക്ഷണം കണഭൗതികത്തിലെ പ്രധാനപ്പെട്ട ഒരാശയമാണ്. അശക്തബലം വഴിയുള്ള പ്രതിപ്രവര്ത്തനങ്ങളില് പാരിറ്റി സംരക്ഷിക്കപ്പെടണമെന്നില്ല. ടി.ഡി.ലീ, സി.എന്.യാംഗ് എന്നിവര് ചേര്ന്ന് നടത്തിയ പ്രവചനവും 1956ല് സി.എസ്.വു നടത്തിയ പരീക്ഷണവും ഇതു ശരിയെന്നു തെളിയിച്ചു. ഈ ഫലം പാരിറ്റിഭഞ്ജനം ( parity violation) എന്ന പേരില് അറിയപ്പെടുന്നു.
ദശാങ്കസംഖ്യാ വ്യവസ്ഥ
പത്തിനെ ആധാരമാക്കിയുള്ള സംഖ്യാപദ്ധതി. ഇതില് 0, 1, 2, 3, 4, 5, 6, 7, 8, 9 എന്നിങ്ങനെ പത്ത് പ്രതീകങ്ങള് ഉപയോഗിക്കുന്നു. ഈ പ്രതീകങ്ങളുടെ മൂല്യം നിര്ണയിക്കുന്നത് നിര്ദിഷ്ട സംഖ്യയിലെ അവയുടെ സ്ഥാനമാണ്. സ്ഥാനവില പത്തിന്റെ ഘാതങ്ങളാണ്.
പി ഒ പി.
post office protocol എന്നതിന്റെ ചുരുക്കം. ഇ മെയിലുകള് വിനിമയം ചെയ്യാന് ഉപയോഗിക്കുന്ന ഒരു പ്രത്യേക തരം സങ്കേതം. പോസ്റ്റോഫീസുകളില് കത്തുകള് കൈകാര്യം ചെയ്യുന്ന രീതിയിലാണ് ഇവയുടെ പ്രവര്ത്തന രീതി.
ശ്ലേഷ്മകം.
ജലസസ്യങ്ങളുടെ കോശഭിത്തിയിലും മറ്റും കാണപ്പെടുന്ന പശപോലുള്ള പദാര്ത്ഥം.